ពីថ្ងៃទី៧ ដល់១០ ខែធ្នូ ឆ្នាំ២០២៥ ឯកឧត្តម ស៊ុន សុវណ្ណា រដ្ឋលេខាធិការ ក្រសួងការបរទេស និងសហប្រតិបត្តិការអន្តរជាតិ បានដឹកនាំក្រុមការងារបំពេញបេសកកម្មការងារ នៅទីក្រុងម៉ុងរ៉េអាល់ ខេត្តកេប៊ិក ប្រទេសកាណាដា។ នៅក្នុងឱកាសនោះ គណៈប្រតិភូកម្ពុជាបានជួបពិភាក្សាផ្លូវការជាមួយ លោកជំទាវ Marie-Josée AUDET អនុរដ្ឋលេខាធិការ ក្រសួងទំនាក់ទំនងអន្តរជាតិ និងហ្វ្រង់កូហ្វូនី នៃរដ្ឋាភិបាលកេប៊ិក លោកសាស្រ្តាចារ្យ Slim KHALBOUS សាកលវិទ្យាធិការនៃទីភ្នាក់ងារឧត្តមសិក្សាប្រើប្រាស់ភាសាបារាំង (AUF) ក៏ដូចជាតំណាងសាកលវិទ្យាល័យ McGill និងសាលាគ្រប់គ្រង HEC Montréal។
កិច្ចពិភាក្សានេះ បានផ្តល់ឱកាសដើម្បីពិនិត្យឡើងវិញ នូវការគាំទ្ររបស់ស្ថាប័នទាំងនេះ សម្រាប់ការរៀបចំកិច្ច ប្រជុំកំពូលហ្វ្រង់កូហ្វូនីលើកទី២០ ដែលកម្ពុជានឹងធ្វើជាម្ចាស់ផ្ទះនៅឆ្នាំ២០២៦ ខាងមុខ ព្រមទាំងបានបញ្ជាក់ជាថ្មីនូវការប្តេជ្ញាចិត្តរួមគ្នា ក្នុងការពង្រឹងកិច្ចសហប្រតិបត្តិការលើវិស័យអប់រំ និងភាពជាដៃគូស្ថាប័ន រវាងសាកលវិទ្យាល័យនានានៃខេត្តកេបិច និងស្ថាប័នឧត្តមសិក្សារបស់កម្ពុជា។
