ជំនួបពិភាក្សាទ្វេភាគីរវាង ឯកឧត្តមឧបនាយករដ្ឋមន្ត្រី ប្រាក់ សុខុន និងឯកឧត្តម Ignazio Cassis
ថ្ងៃទី២១ ខែវិច្ឆិកា ឆ្នាំ២០២៥
នៅរសៀលថ្ងៃទី២០ ខែវិច្ឆិកា ឆ្នាំ២០២៥ ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ បានអញ្ជើញជួបពិភាក្សាទ្វេភាគីជាមួយ ឯកឧត្តម Ignazio Cassis រដ្ឋមន្ត្រីការបរទេសនៃសហព័ន្ធស្វ៊ីស នៅទីក្រុងគីហ្គាលី ប្រទេសររ៉ាន់ដា។
ក្នុងឱកាសនៃជំនួប រដ្ឋមន្រ្តីទាំងពីរបានវាយតំលៃខ្ពស់ពីការរីកចម្រើននៃទំនាក់ទំនងទ្វេភាគីរវាងប្រទេសទាំងពីរ និងពិភាក្សាពីកាជំរុញកិច្ចសហប្រតិបត្តិការដែលមានស្រាប់អោយកាន់តែស៊ីជម្រៅបន្ថែមទៀត។ ឯកឧត្ដមឧបនាយករដ្ឋមន្ត្រី ក៏បានថ្លែងអំណរគុណដល់ប្រទេសស្វីសដែលបានផ្តល់ជំនួយអភិវឌ្ឍន៍ដល់កម្ពុជា ជាពិសេសលើវិស័យសុខាភិបាល ការដោះមីន វប្បធម៌ និងអភិបាលកិច្ចមូលដ្ឋាន។ ភាគីស្វីសបានសំដែងការគាំទ្រចំពោះកម្ពុជាសម្រាប់ការធ្វើជាប្រទេសម្ចាស់ផ្ទះនៃកិច្ចប្រជុំកំពូលហ្វ្រង់កូហ្វូនីលើកទី២០ នៅឆ្នាំ២០២៦ និងទន្ទឹងរង់ចាំចូលរួមក្នុងព្រឹត្តការណ៍ដ៏ដ៏មានសារៈសំខាន់នេះ។
